LAOAG CITY – Ibilang ti Russia a seryoso ti nagbalin a rakurak ni United States President Donald Trump mainaig iti panangipatawna ti nangato a taripa ken sanctions kadakuada.
Inbatad ni Kremlin spokesperson Dmitry Peskov a saanda a tagtagabassiten daytoy a rakurak ni Trump imbes ket kasapulanda pay ti naan-anay a panawen tapno agsungbat.
Kunana nga ad-adalen ni Russian President Vladimir Putin sakbay a mangipaay ti aniaman a komento maipanggep iti nasao a banag.
Immunan nga inpakaammo ni Trump nga addaan ti 50 nga aldaw ti Russia tapno agsungbat iti ilunglungalongda a ceasefire deal iti nagbaetan ti Ukraine ken no agkedkedda ket patawanda ti 100 a porsiento a taripa.
Naammoan a mairaman dagiti pagilian a gumatgatang ti langis ti Russia.
Inrakurak met ni North Atlantic Treaty Organization (NATO) Secretary General Mark Rutte a maapektaranna ti Brazil, China ken India gapu iti agtultuloy a panaggatangda ti langis iti Russia.
