LAOAG CITY – Inrakurak ni United States President Donald Trump nga immannugoten ti Russia a makikappia iti Ukraine.
Daytoy a rakurak ket kalpasan ti dua nga oras a nagsarita da Trump ken Russian President Vladimir Putin iti telepono.
Inbatad ni Trump a kimmanunongen ni Putin ken ipaimana daytoyen ti aniaman a kondision a maidatag para iti naan-anay a pannakailungalong ti peace deal.
Kalikagum ti Russia a maaddaan ti dakkel nga investment iti Estados Unidos no nalpasen ti rinnupak iti nagbaetanda ti Ukraine.
Naammoan a kalpasan ti tawag ket inpakaammo ni Trump ti nagsaritaanda kadagiti sumagmamano a lider ti pagilian kas kada Ukrainian President Volodymyr Zelenskyy, European Commission President Ursula von der Leyen, French President Emmanuel Macron, Italian Prime Minister Giorgia Meloni, German Chancellor Friedrich Merz ken Finnish President Alexander Stubb.
Pabor met ni Trump a nasken a bumallaet iti peace deal ni Pope Leo XIV.
Maipalagip a namin-adun a daras a naaddaan ti panagsarita dagiti pannakabagi ti Estados Unidos, Russia ken Ukraine ngem awan ti aniaman a katulagan ti malmalpas tapno naan-anayen nga agsardeng ti sumurok tallo a tawenen a riribuk.
