LAOAG CITY – Nagyaman ni Russian President Vladimir Putin ken ni North Korean Leader Kim Jong Un gapu iti kinatured dagiti tropa na a makilablaban iti Ukraine para iti pagilian da.
Inaramid daytoy ni Putin iti panagkita da ken ni Kim idiay Beijing kagidda ti panagatendar da ti maibilang a kadakkelan a military parade kas paset ti maika-80 a selebrasyon ti isusukon ti Japan ken panagpatinggan ti World War II iti Asia.
Daytoy met ti kaunaan a gundaway a nagatendar ti North Korean leader iti international gathering ti world leaders.
Maipalagip a ni Kim ket manmano laeng a rumuar iti North Korea ken naipagagangayen kenkuana a saggaysa laeng a lider ti katartaripnong na.
Iti panagsango da Kim ken Putin, inbatad ti Russian President a kaanuman ket saan nanto a malipatan ti sakripisyo ken panagsagaba dagiti soldado ti North Korea pakairamanan ti pamilya da.
Inpeksa met ni Kim ti panagyaman na iti panangbigbig ti lider ti Russia kadagiti tropa ti North Korea.
Innayon na a no aniaman ti mabalin da nga itulong iti Russia ket aramiden da kas maysa a nainkabsatan a pagrebbengan.
Immunan nga inreport ti South Korea nga umabot iti nasurok a 15 ribo a tropa ti North Korea ti naipatulod iti Russia tapno tumulong iti pannakilablaban da iti Ukraine.
