LAOAG CITY – Manamnama ti ibibisita ni Russian President Vladimir Putin idiay North Korea.
Ti nasao a panagbisita na idiay North Korea ket maibilang kas kaunaan a panagbisita na iti uneg ti 24 a tawen, no sadinno a ti maudi nga ibibisita ni Putin ket idi pay laeng Hulyo 2000 idiay Pyongyang.
Mabalin a pirmaan dagiti dua a pagilian ti katulagan maipapan ti seguridad ken ti pannakapapigsa ti partnership ti dua a pagilian.
Sumagmamano kadagiti delegado a kadua ni Putin ket da Russian Defense Minister Andrei Belousov, Foreign Minister Sergei Lavrov ken Deputy Prime Minister Alexander Novak.
Kalpasan ti North Korea, ket plano ni Puti iti Vietnam inton Hunio 19 agingga 20.
Maipalagip a silulukat ti Russia nga ipakita ti relasionna iti North Korea sipud pay idi nangrugida a mangraut iti Ukraine, no sadinno a madanagan met ti Estados Unidos gapu ta inakusaranna ti North Korea a mangsupsuplay iti armas iti Russia tapno usarenda a makigubat iti Ukraine.
Uray ti South Korea ket madanagan iti nairut a relasion ti North Korea ken Russia gapu ta sigurado a papigsaenda dagiti armasda a mangipasimudaag ti panaglabsing kadagiti resolusion ti United Nations.
Kabayatanna, maipalagip nga idi napalabas a Setyembre 2023, ket bimmisita ni North Korea lider Kim Jong Un ti pagilyan a Russia no sadinno nga inimbitaran na ni Putin nga agturong met iti pagilyanda.
