LAOAG CITY – Adda iti agdama ni Russian President Vladimir Putin idiay Mongolia.
Daytoy ti kaunaan nga ibibisita ni Putin iti Mongolia a miembro ti International Criminal Court (ICC) sipud naisyu ti warrant arrest kontra kenkuana iti napalabas a tawen.
Nabara a sinarabo ti lider ti Mongolia ni Putin ken inpaayan da pay ti nagarbo a seremonya iti mismo a ciudad ti Ulaanbaatar.
Ti lider ti Russia ket sapsapulen ti korte gapu iti maipagarup nga illegal a pannakaideportar dagiti ubbing a taga Ukraine.
Inbatad ti pannakangiwat ti Kremlin a saan a madanagan ni Presidente Putin iti possible a pannakatiliw na iti ibibisita na iti Mongolia.
Kabayatanna, iti baet a nabara ti panangsarabo ti lider ti Mongolia ken ni Putin ket adda latta dagiti sumagmamano nga indibidual a nakaitured a nangiyuswat ti tignay protesta ken nakaiggem dagitoy ti placards a nakaisuratan ti “Get War Criminal Putin out of here”.
