LAOAG CITY – Umanamong ni Russian President Vladimir Putin iti lungalong a ceasefire iti Ukraine, ngem kunana a siguradwen a daytoy ket mangitunda iti awan patinggana a kapia.
Reaksyon daytoy ti Russian president iti plano a pannakaipatungpal ti 30-day ceasefire, nga immunan nga inanamongan ti Ukraine kalpasan iti pannakitaripnong na iti Estados Unidos.
Mainaig iti daytoy, adda pay dagiti narigat a kondisyon ni Putin para iti pannakaipatungpal ti ceasefire kas iti panangbigbig nga umuna ti Ukraine ti annexation ti Russia iti Crimea ken 4 a rehiyon a tagtagikwaen na kas annex, karaman ti Donetsk, Kherson, Luhansk ken Zaporizhzhia oblasts.
Dinakamat na pay ti panagsanud dagiti tropa ti Ukraine kadagiti lote a tagtagikwaen ti Russia ken nagkari a saan a makikappeng iti North Atlantic Treaty Organization (NATO).
Inawagan met ni Ukrainian President Volodymyr Zelensky kas “manipulative” dagiti kondisyon ni Putin ken nagpanawagan iti ad-ado a sanctions kontra iti Russia.
Kabayatanna, nangipatungpal ti nadagdagsen a sanctions ti Estados Unidos iti Russian oil, gas ken banking sectors.
Kabayatanna, inpalgak ni Putin nga adda pay dagiti soldado ti Ukraine iti Kursk no sadinno a nagpangta a dua laeng ti pagpilyan dagitoy, ti sumuko wenno matay.
