LAOAG CITY – Saan a covid-19 virus ti nakatayan ti maysa a lalaki iti ili Barangay San Julian iti ili ti Solsona.
Immuna a nagturong ti saanen a nainaganan a lalaki iti Piddig District Hospital iti ili ti Piddig tapno mapan agpacheck-up, ngem gapu ta adda dagiti sumagmamano a sintomas ti covid-19 virus ket pinagawid da daytoy.
Karaman kadagiti napasaran a sintomas ti lalaki ket ti panaguyek, panag-LBM ken dadduma pay.
Kalpasan ti sumagmamano nga aldaw ket pimmusay daytoy, ngem inpadalan da pay laeng ti swab test.
Inbaga ni Mayor Joseph de Lara iti ili ti Solsona a gapu ta maatap a covid-19 ti nakatayan ti nasao a lalaki ket itabon da koman a dagus.
Nupay kasta, iti pannakaitabon koman ti lalaki ket isut metten ti pannakaawat ti resulta ti swab test na a mangibagbaga a negatibo daytoy iti covid-19.
Naamoan a ti nasao a lalaki ket nakaro ti panagin-inom na ti arak idi sibibiag pay.
