LAOAG CITY – Kinumpirmaran ni Police Captain Randy Damo, Hepe ti Philippine National Police iti ili ti Solsona a saan a bangkay ti maysa a maladaga ti nakita a nakasupot a naikali iti daga iti paset ti Gasgas Bridge iti nasao nga ili.
Segun kenkuana, daytoy ket kalpasan a nakaawatda ti report nga adda ti maipagarup a nakita dagiti sumagmamano a tattao a bangkay ti maysa a maladaga iti sirok ti rangtay.
Gapu iti daytoy, kunana a dagusda mismo a nagturong iti lugar a maitudtudo a nakaikalian ti maipagarup a bangkay ti maysa a maladaga.
Nupay kasta, inlawlawagna nga apaman a nakadanonda iti lugar ket insigida a linuktanda ti supot a mapapati a nakaikabilan ti bangkay ti maysa a maladaga ngem ditoy a naduktalanda a daytoy ket posible a bangkay ti ayup a mabalin a pusa wenno aso gapu ta kas maibasar iti assestment-da ket adu a dutdot ti nakitada iti supot.
Kabayatanna, nagpanawagan ni Police Captain Damo iti publiko a responsibilidad dagiti akin-taraken dagiti natay a dingwen nga ikalida iti nasayaat ken umiso a lugar tapno maliklikan ti nabangsit nga angot.
