LAOAG CITY – Inpakaammo ni Atty. Donato Balderas Jr. ti Schools Division Superintendent iti Department of Education ti Ilocos Norte a saan a maikonsiderar kas absent ti maysa nga estudiante a saan nga agatendar iti klase gapu iti nabara a panawen.
Segun kenkuana, nakailanad iti general modality nga inaramid ti Department of Education ket in person ngem iti agdama ket nagsukat ti sabali a modality a maipatungpal gapu iti extreme heat index.
Inbatadna a gapu iti daytoy ket saan a maikonsiderar nga absent ti estudiante no saan a sumrek uray awan ti rakurak a nakanselar ti klase manipod iti mangidadaulo iti pagadalan, Local Government Unit officials wenno iti Department of Education.
Inlawlawagna a nakailanad pay iti pagannurutan ti Department of Education a no 20 a porsiento ti pakabuklan a bilang dagiti aldaw ti maysa nga School Year ket absent ti estudiante, otomatiko a drop out ngem kunana a saan nga epektibo daytoy a pagalagadan.
Innayonna nga awan ti ma-drop out gapu iti physical absences.
Immuna iti daytoy, inrakurak ti Department of Education ditoy probinsia a malaksid kadagiti mangidadaulo iti pagadalan ken Local Government Unit officials ket mabalin nga agdesision dagiti nagannak no ibaonda wenno saan dagiti annakda kadagiti pagadalan tapno agadal.
