LAOAG CITY – Inbatad ni Mr. Rogelio Balanos, maysa a construction worker nga agpapaay iti housing project iti Santa Monica Homes iti Brgy. Santa Asuncion iti ili ti San Nicolas a desidido da a mangireport iti DOLE nu bilang awan pay ti maited a sweldo da kadagiti sumarsaruno nga aldaw.
Daytoy ket gapu ta umaboten iti tallo a lawas a saan a naited ti sweldo kadakuada a construction workers.
Segun ken ni Balanos, 2,000 pay laeng ti naawat da a bale manipod iti foreman da.
Kuna na a naikari ti pannakaited ti sweldo da ita a lawas ngem saan a natungpal.
Inbatad na a kasapulan da ti kwarta para iti kasapulan ti pamilya da iti inaldaw ngem kaskasdi nga awan pay ti naawat da a sweldo.
Immunan nga inpakaammo ni Balanos a 550 a pisos ti sweldo da iti inaldaw.
Inpakaammo na nga addan ti gundaway a ti foreman ti mangab-abunar kadagiti kasapulan da gapu iti kaawan ti sweldo a maaw-awat da.
Kabayatanna, naamoan manipod iti contractor a ni Engr. Bing Magdael a ti foreman ket maipagarup nga addaan ti sabali nga awat a proyekto iti Metro Manila ken isu ti posible a nakausaran na ti pondo a para koma iti sweldo dagiti constrcuction workers.
