LAOAG CITY – Masapol a makita ti pudno a nakaipanan ti pondo a naiyalokar para iti proyekto a pabahay iti ili ti Solsona.
Daytoy ti inbatad ni bise mayor Jonathan de Lara iti nasao nga ili kalpasan a saan a naileppas dagiti pabahay.
Kuna ni de Lara a nabayagen a problema iti nasao nga ili ti pabagay gapu ta saan a nakumpleto a naiyawat kadagiti recipients.
Inbatad na a sakbay pay a nagbaliw ti mangbukbukel iti konseho ket addan ti panagkiddaw ti konseho iti certified true copy dagiti dokumento manipod iti DSWD nga isu ti kangrunaan nga akin iggem ti nasao a proyekto.
Nu pay kasta, kuna na nga agpapan ita ket awan pay dagiti naipaima kadakuada.
Immunan nga inpakaammo ni de Lara a dagiti saan a naileppas a balay babaen iti pabahay ket mismo a dagiti recipients ti nangituloy.
Inbunannag na a burburtsa met kenkuana ti rason nu apay saan a trinatar ti dati nga administrasyon iti nasao nga isyu.
Patien ni de Lara a posible a pananglapped iti panangipaay ti napintas a proyekto iti ili ti Solsona ni Mayor Joseph de Lara ti saan a pannakatratar ti isyu.
Kabayatanna, kuna ti bise mayor a kas chairman iti konseho, nangbukel da ti adhoc committee nga isu ti agpokus iti imbestigasyon mainaig iti saan a naileppas a pabahay.
Inpakaammo na a daytoy ket idauloan ni Sangguniang Bayan Member ken Atty Lordines del Cruz kas chairman idinto a dagiti co-chairman ket ni SBM Marvin Pascua kenni SBM Gerald Ganotisi.
Innayun ni de Lara a nakaaramid da metten ti dua a resolusyon para iti panakkakiddaw ti certified true copy ken addan ti naipatulod a surat iti secretary ken regional director iti DSWD.
Maipalagip a ti dati a mangidadaulo iti konseho ket ni dati a bise mayor Bob Sacro ken karaman ni SBM Marc Dennis del Castillo, kalaban a partido ti team de Lara.
