LAOAG CITY – Inlungalong ni House Deputy Speaker ken Quezon Rep. David “Jayjay” Suarez nga imbestigaran ti Kamara de Representantes ti kellaat a panagngato ti presio ti langis ditoy pagilian iti baet nga adda ti umdas a suplay.
Inpetteng ni Suarez, adda pay ti stock ti langis ngem no apay nga insigida a maipasa kadagiti umili ti dagsen ti panagngato ti presio gapu iti tension idiay Middle East.
Ti kiddaw nga imbestigasion ket nakaipalaon iti House Resolution 852 nga inlungalong ni Suarez a gagem nga ammoen ti nagbalin a nagibasaran ti pump price adjustments ken no adda ti ipatpatungpal a proteksion para iti consumers.
Mainaig iti daytoy, pagisubsubmitiren ni Suarez ti detalyado a report ti Department of Energy (DOE) mainaig iti garaw ti presio, inventories, benchmarks ken legal a pagibasaran para iti emergency measures.
