LAOAG CITY – Mamati ni Dr. Ryan Samuel Ramos, Associate Professor I iti Mariano Marcos State University – College of Industrial Technology ken dati a Focal Person for Institutional and Program Accreditation, iti pagsasao nga awan ti narigat no ay-ayaten ti trabaho ken dagiti ar-aramiden.
Ni Dr. Ramos ket umaboten iti 18 a tawen a mangisursuro, a ti immuna a nangipakatan na iti propesyon na ket iti Divine Word College of Laoag ditoy ciudad ti Laoag sakbay nga immakar iti Mariano Marcos State University.
Inadmitir na a ti panagisuro ket saan a nalaka gapu ta agduduma ti panagug-ugali dagiti estudyante,malaksid pay dagiti bukod a personal a problema a mabalin a makaapektar iti peace of mind da a mangaramid kadagiti trabaho da.
Nupay kasta, kuna na a ti kanayun a laglagipen tapno saan a basta sumuko iti trabaho ket daytoy ti sinapataan a propesyon ken masapol nga ipaay da ti usto a pagrebbengan da kas mangisursuro.
Innayon ni Ramos a ti naipasagepsep pay iti panunot na ket awan ti serbi dagiti mangisursuro no awan dagiti agad-adal.
Inlawlawag na a ti ababa a pannarita, dagiti agad-adal ti natibker nga adigi ken pundasyon iti sektor ti edukasyon.
Kuna pay ni Ramos a no adda ti pannakaupay da a mangisursuro gapu iti panagug-ugali dagiti estudyante, kinababa ti sweldo ken kaado ti magastos gapu kadagiti mai-require a kasapulan da iti panagisuro, ti laeng nasken da nga aramiden ket no kasanu da a naan-anay nga awaten dagiti karit ken pannubok tapno maipasagepsep ken maipapuso da ti propesyon da uray kasano ti kinarigat na.
Inrakurak pay ni Dr. Ramos nga alisto ti panagballigi na mamati a naikari para kenkuana ti agisuro ken daytoy ti arapaap na.
