LAOAG CITY – Inlawlawag ni Vice Mayor Rey Carlos Fariñas ditoy siudad ti Laoag a saan a nasken a diktaran dagiti tricycle drivers no asino ti kalikagumda a suportaran a kandidato para iti May 2025 National and Local Elections.
Segun kenkuana, saan a nainkalintegan a masapul pay laeng a butbutngen dagiti tricycle drivers tapno maala ti butos dagitoy.
Inbatadna nga awan ti karebbengan dagiti Kapitan a mangipawil kadagiti tricycle drivers no asino ti kayatda a suportaran a kandidato ita nga eleksion.
Mainaig iti daytoy, inpakaammona a nakasarsaritana ti Kapitan ti Barangay Navotas-B ditoy siudad ti Laoag maipanggep daytoy a banag no sadinno ket inbagana kenkuana a saan a napintas dagiti ar-aramiden dagiti dadduma a padana a Kapitan a mangbutbuteng kadagiti kabarangayanna tapno laeng sumurotda ti kayatda a butosan.
Maipalagip a nangipatulod ti surat ti Sangguniang Panlungsod kadagiti kapitan ditoy siudad ti Laoag a maipagarup a nangbutbuteng kadagiti tricycle driver a simmurot iti motorcade ti maysa a kandidato ditoy siudad ti Laoag.
