LAOAG CITY – Mamati ni House prosecutor, Rep. Lorenz Defensor a ti saan a panangidakamat ni Presidente Ferdinand Marcos Jr. iti impeachment trial ni Vice President Sara Duterte iti maika-lima nga State of the Nation Address-na ket nangipakita ti saanna a pannakiraman iti agtultuloy a trial.
Iti pannakisarsarita ti Bombo Radyo ken ni Defensor, inbatadna nga umanayen ti nagbalin a rakurak ni Presidente Ferdinand Marcos Jr. kas sungbatna iti November 2024 Zoom Press Conference ni VP Sara a pinangtaan ti Bise ti biag ti Presidente.
Segun ken ni Defensor, saanen a masapol a dakamaten ni Presidente Ferdinand Marcos Jr. iti public speeches-na ti opinion-na iti agtultuloy nga impeachment proceedings, tapno saan daytoy a maawagan a pamumulitika.
Kabayatanna, kalikagum ti agpanpanday linteg na malpasen ti impeachment trial kontra iti Bise.
Inpettengna a nasaysayaat no simple ti agbalin a presentasion dagiti ebidensia ken testimonia dagiti witness.
Iti baet daytoy, inpanagetget ni Rep. Defensor a masapol a maikkan ti naannanay a panawen dagiti kaduana nga agpanpanday linteg a naakusaran mainaig iti flood control scandal.
Maipalagip nga immunan a naipilaan ti agsusukot a kaso ni Uswag Ilonggo Partylist Rep. Jojo Ang Jr. ken ti pananngidakamat ni Presidente Marcos ti manamnama a panangipila ti kaso kontra iti dati a House Speaker.
Segun ken ni Defensor, masapol a maikkan dagiti nadakamat nga indibidual ti tsansa a paneknekan ti kina-inosenteda ngem no maamoan a naglabsingda ket nasken a maipilaan dagitoy ti kaso nga administratibo.
