LAOAG CITY – Inlawlawag ni Vice Mayor Windell Chua iti siudad ti Batac nga awan ti maris pulitika iti saan a pannakaaprubar ti franchise ordinance ti cockpit arena iti nasao a siudad.
Segun ken ni Chua, adda dagiti naamiris a sumagmamano a problema iti panangadal ti Committee on Games and Amusement iti prangkisa ti cockpit arena.
Inbatad na a nu pay mabaybayadan ti Games and Amusement Tax ti pagpallotan ket adda ti maipagarup a saan a pannakabayad ti tax dagiti agop-operar a canteen iti uneg daytoy.
Maipalagip nga immunan a naidasar iti konseho ti ordinansa seknan iti renewal ti franchise to operate ti cockpit arena iti siudad ti Batac
Daytoy ket kalpasan nga adda ti petition ti operator ti cockpit arena a ni Julius Marcos Nalupta a maisubli ti operasyon da babaen iti pannakaipabaro ti prangkisa na.
Nagsardeng ti operasyon ti cockpit arena gapu iti panag-expire ti prangkisa daytoy iti napalabas a tawen.
