LAOAG CITY – Dakkel a pukaw para kadagiti Pilipino ti saan a pannakaituloy ti tallo manipod iti uppat nga articles of impeachment.
Daytoy ket dagiti Article 1: misuse of confidential funds, Article 3: bribery; ken Article 4: death threats against President.
Inbatad ni Niño Oconer, Secretary-General, La Union Peace and Justice Advocates, a daytoy ket gapu ti possible a pannakaiyalisto ti panangusig iti bise presidente iti pammati ti Prosecution a makaalada ti umdas a bilang ti butos para iti conviction.
Segun kenkuana, arigna agbalbalin a circus ti impeachment court gapu ta dakkel ti posibilidad na nga adda pakainaigan daytoy iti 2028 elections tapno masinunuo dagiti partido ken ti surotanda nga agtaray a sumaruno nga agbalin a presidente.
Inpettengna a dakkel a pukaw dagiti umili ti saan a pannakaituloy ti saan nga umno a pannakausar ti confidential funds gapu ta daytoy ti kangrunaan a rason no apay a narugian ti impeachment trial.
Kunana a mapukaw manen ti gundaway dagiti umili a mapagsungbat dagiti kasapulan nga agsungbat ken maibutaktak dagiti iregularidad mainaig iti saan nga umno a pannakausar ti confidential ken intelligence funds ti gobierno.
Innayon na a kasapulan nga agserbi daytoy kas gundaway dagiti umili tapno maipamatmat ti korapsion ken maaddaan ti reporma.
