LAOAG CITY – Irekreklamo ti maysa a residente iti Barangay 20 San Miguel MH. Del Pilar Corner Basa Street ditoy ciudad ti Laoag ti saan a maitultuloy a kontruksyon ti kanal iti lugar da.
Impakaammo ti nasao a residente a natubtob ti drainage sipod pay idi Oktubre idi napan a tawen ngem agingga ita ket saan pay a nailiplipas.
Apaman ti panagturong iti nadakamat a lugar ket ditoy a naimatangan ti pannakagabor ti nasao a kanal no sadinno a ginaboran da daytoy iti ligay, nagtubtoban ti semento, ken daga nga arigna ket saan pay a naplastar ti pannakagabor na.
Malaksid a natapok ken saan a maitultuloy a konstruksyon ket mabalin pay a mangitunda daytoy iti disgrasya.
Kabauyatanna, nagturong pay ti news team ti Bombo Radyo Laoag ken ni Barangay Kapitan iti Barangay 20 no sadinno nga impkaammo na a naipasardeng daytoy gapu ta awan pay ti posting ti proyekto.
Inpanamnama met ti kapitan a maituloy ti kontruksyon ti drainage inton umay a lawas.
