LAOAG CITY – Nagpanawagan ni Ms. Judie Sabas, ti mangidadaulo ti Land Transportation Office (LTO) ditoy siudad ti Laoag seknan ti saan a pannakausar ti nagan ti nasao nga opisina iti aniaman a wagas.
Daytoy ket mainaig pay laeng ti pannakausar ti nagan ti LTO iti facebook page wenno group nga LTO Alert Ilocos Norte nu sadino mai-popost ti pakaiyus-uswatan dagiti checkpoint.
Segun ken ni Sabas, saan a rumbeng a mausar madakdakamat ti nagan ti LTO iti nasao a banag ken dadduma pay gapu ta mangipakita daytoy ti kinaawan ti respeto iti nasao nga opisina.
Inbatad na a kangrunaan pay a saan nga umno a pannakausar ti nagan ti LTO ket nu negatibo ti pakaipapanan na iti daytoy ken iti pannakapadakes dagiti enforcers.
Mainaig iti daytoy, kuna ni Sabas a maipadanon iti legal department ti Regional Office ti LTO daytoy a banag.
Inpetteng na nga awan ti sabali nga addaan ti karbengan a mangusar ti nagan ti LTO nu di ket ti laeng mismo nga opisina.
