LAOAG CITY – Inbunannag ni Vice Gov. Cecilia Araneta Marcos a nakigtot daytoy idi naamoan na a karaman isuna kadagiti alegasion da Dumalneg Vice Mayor Francis Espiritu ken ti Legal Counsel-na a ni Atty. Ferdinand Ignacio.
Segun ken ni Vice Gov. Marcos, awan ti napasamak a transaksion ken saan a pudpudno ti alegasion kontra kadagiti bokal ti hunta probinsial.
Inbatad na a saan da nga ipalubos a madadael ti reputasyon ken talek kadakuada dagiti umili kasukat laeng iti mano a kantidad.
Gapu iti daytoy, maluksaw ti bise gobernador agsipod ta uray ti nagan na ket nairamraman pay iti daytoy nga isyu.
Inpettengna a saanna a maaramid ti nasao a banag gapu ta adda ti panagbutengna iti Dios.
Maipalagip nga inbutaktak ni Dumalneg Vice Mayor Francis Espiritu a maipagarup a dumawdawat kenkuana ni Sangguniang Panlalawigan Member Domingo Ambrocio ti 300 a ribu a pisos kasukat ti saanna a pannakasuspenso.
Kabayatanna, silulukat ni Bise Gob. Cecilia Araneta Marcos no bilang adda maiyuswat nga imbestigasyon iti Sangguniang Panlalawigan.
Manamnama nga intuno Inton Lunes, Nobiembre 9, ket agsasango ti agsinnungbangir a partido a da Froilan Suniga ken ni Dumalneg Vice Mayor Francis Espiritu pakairamanan dagiti Legal Counsel da kasta pay nga agatendar dagiti kameng ti Media nga imatangan dagiti kameng ti Sangguniang Panlalawigan a nairamraman iti daytoy a banag.
