LAOAG CITY – Saan a rumbeng a lipaten ti EDSA People Power Revolution a napasamak idi tawen 1986 gapu ta daytoy ti kangrunaan a nakabigbigan ti Pilipinas iti intero a lubong ken pakasaritaan ti pagilian.
Segun kenni Fr. Joey Ranjo, pannakangiwat ti Diocese of Laoag, ti Pilipinas ti nangirugi ti rebulusyon a tinulad met dagiti sumagmamano a pagilian.
Inadmitir ni Ranjo a natalna ti panagbiag dagiti umili kadagiti nagduduma a probinsya ngem adu met dagiti insidente a pakariribokan dagiti tattao kangrunaan na iti Metro Manila.
Saan na a masinunuo ti pudno a panagbiag dagiti tattao gapu ta adu ti mangibaga a nsaysayaat idi panawen ni dati a presidente Ferdinand Marcos ken adu met ti mangibaga a nalaad ti dati nga administrasyon.
Inlawlawag na a daydi Marcos ket lumakayen ken nasken nga adda ti mangsukat a mangidaulo ti pagilian ngem naaramid ti saan nga husto a prosseso iti panagsukat ti presidente.
Kuna ni Ranjo a saan a maliklikan ti panagbaliw ti amin a banag ngem nasken nga akseptaren dagiti Pilipino a napasamak ti EDSA Revolution gapu ta mabalin a paset daytoy iti napinpintas pay a panagbiag.
