LAOAG CITY – Inpasingked ni Dr. Joseph Adaya, iti City Health Office ditoy siudad ti Laoag, a saan nga agkurang ti puersa dagiti agbantay iti Brgy. 20 ditoy siudad kalpasan a nagbalin a primary exposure ti maysa nga opisyal ti barangay babaen iti nagpositibo ti COVID-19 itay kallabes.
Kuna na nga agserbi pay laeng dagiti barangay lupon bayat a nakaquarantine ti maysa nga opisyal ti barangay kasta met dagiti naibilang a secondary exposure.
Segun kenni Adaya, maipadalan dagiti maseknan iti swab testing ken panaghome quarantine bayat a maiyur-uray ti resulta ti swab test dagitoy.
Inbatad na a babaen iti daytoy ket masapul a makikooperar kuma dagiti residente iti nasao a barangay para iti nataltalged a sitwasyon dagitoy kabayatan ti MECQ ken iti baet a nangato ti bilang dagiti kaso ti COVID-19 ditoy siudad.
Mainaig iti daytoy, dagus a naiyuswat ti disinfection iti Barangay Hall babaen ti panangidaulo ni Major Roxanne Parado, mangidadaulo iti BFP Laoag.
