LAOAG CITY – Inlawlawag ni Miss Noemi Ruadap, OIC iti Community Environment and Natural Resources Office (CENRO) ditoy ciudad ti Laoag dagiti epekto dagiti nakaad-ado a plastik, kas kadagiti tarpaulins ken dadduma pay a campaign materials nga agkaiwarang ditoy probinsya.
Inpalagip ni Ruadap a dagiti plastic ket non-biodegradable ken atiddog ti biagda nga umabot pay iti 100 a tawen.
Inbatad na a grabe ti epekto na iti aglawlaw dagiti plastik gapu ta no maipan dagitoy iti danom ket dakkel ti posibilidad na a matay dagiti lames ken amin a nabiag iti uneg ti danom a makapangan kadagiti plastic.
Kuna na pay a saan a napintas a makitkita dagitoy nga agtatapaw ti danom idinto a no agpuur kadagiti plastic ket makaparnuay ti ado a toxic gas iti atmosphere.
Innayon na a no mapasamak daytoy ket makaitunda ti sakit, saan laeng a kadagiti tattao no di ket uray dagiti animal ken nabiag iti rabaw ti daga.
