LAOAG CITY – Inlawlawag ni Dr. Alan Taylan iti St. Camillus De Lellis Hospital a ti glutathione ket immuna a nakita dagiti eksperto kadagiti ag-chem-chemo therapy, a manglaban iti active oxygen species a mangperdi ti bagi.
Gapu iti daytoy ket nadlawda a pimmudaw dagiti agchem-chemo, issu ti rason no apay ado dagiti agus-usar ti glutathione kas pagpapintas iti kudil.
Ngem inpetteng ni Taylan a saan a napintas ti regulasyon na daytoy gapu ta naruay dagiti saan a lisensyado nga agi-inject a mabalin nga ag-drug reaction, a pakapasara ti skin rashes a mangitunda ti inpeksyon a mangapektar iti dalem ken kidney.
Kunana nga ado ti brand ti glutathione a mabalin a ti dadduma ket saan a dimmalan iti Food and Drug Administration.
Daytoy ti rason no apay nga ikagkagumaan ni Health Secretary Ted Herbosa ti naiget a panagmonitor iti regulasyon gapu ta naruay dagiti saan a lisensyado nga agitudtudok ti glutathione
Naammuan a ti pangitudok ti glutathione ket adda dosage na basar iti tawen ti pasiente.
Maipalagip nga idi 2018 ket adada dagiti damag a 69 a pasiente ti nagkomplikasyon gapu iti saan nga usto a wagas a panagusar ti glutathione, no sadinno a ngimato ti blood sugar, skin rashes, marigatan a panaganges, panagulaw
Kabayatanna, nagballaag ni Taylan a no kalikagom a pumintas ti kudil ket mangan ti nasustansya nangruna ti naten ken prutas.
