LAOAG CITY – Naduktalan ti dua a baro a kaso ti monkeypox iti Quezon City, no sadinno nga umaboten iti tallo ti nairekord iti nasao a siudad.
Iti statement a nairuar idi laeng kalman, pinasingkedan ti gobierno ti siudad ti Quezon a ti maikadua a kaso ti monkeypox ket maysa a lalaki nga agtawen iti 29 idinto a ti maikatlo a kaso ket maysa a lalaki nga agtawen iti 36.
Ti maikadua a kaso ket nangrugi a makarikna iti sintomas kas iti sakit ti ngiwat idi Agosto 21 ken na-test para iti monkeypox idi Agosto 28 no sadino a rimmuar ken nagpositibo iti nasao a sakit ti resulta idi Agosto 30.
Iti maikatlo a kaso, naaddaan iti gurigor ken rashes ti biktima idi Agosto 26.
Nagpositibo met ti resulta ti monkeypox test ti specimen ti pasiente idi Setiembre 5.
Iti agdama, agpada a madama ti home isolation ken umaw-awat iti medikal nga atension dagiti dua.
Maipalagip a ti pannakairekord ti dua a baro a kaso ket makalawas kalpasan nga inwaragawag ti Quezon City Local Government Unit ti umuna a kaso ti monkeypox iti siudadda.
Kabayatanna, naisayangkat metten ti contract tracing para kadagiti nakakontak dagiti dua.
