LAOAG CITY – Nakadiskubre dagiti otoridad ti sabali manen rikki iti Highway 130 idiay Leilani Estate subdivision, Puna District, Big Island Hawaii.
Daytoy ti kinumpirmaran ni Interantional Bombo Correspondent Manny Pascua.
Kuna na a pinaserraan dagiti otoridad ti nasao a kalsada gapu iti kinarisgu ti sitwasyon ti Kilauea volcano.
Segun kenni Pascua, nagtalinaed a 10 dagiti pagpuspuswakan ti lava iti nasao a distrito.
Inbatad na nga umab-abot metten ti 35 nga istruktura ken balay dagiti linamot ti lava iti agtultuloy a panagpuswak ti lava iti nasao a lugar.
Mainaig a damag, inikkat dagiti otoridad dagiti flammable chemicals a nakapondo iti Geothermal Plant iiay Puna District. Big Island Hawaii.
Daytoy ti kinumpirmaran ni International Bombo Correspondent Manny Pascua iti pannakiuman kenkuana ti Bombo Radyo Laoag.
Kuna na ket tapno maprebentaran ti nakarkaru pay a didigra bayat a kumarkaru ti sitwasyon gapu iti panagayus ti lava iti nasao a lugar.
Kabayatanna, inpasingked ni Pascua a saan nga apektado dagiti residente malaksid iti napasamak a gingined idi Biernes.
Inpakaammo ni Bombo Correspondent Manny Pascua manipud idiay Hawaii a nabalakadan da nga agusar ti abbung ti agong ken ngiwat gapu ti asok idiay Leilani subdivision Big Island, Hawaii.
Kuna na a napeggad para kadagiti addaan ti respiratory problem ti asok nga iparparnuay manipud ti agpuspuswak a lava.
Inbatad ni Pascua a naiget ti suportar ti gobyerno ti Hawaii ken state government gapu ta dagus a maikkan ti tulong dagiti naapektaran uray saan da a kiddawen ti gobyerno.
Kabayatanna, posible a saanen a makapan dagiti Ilokano iti Papaya farm da tapno agburas dagiti naluum nga bunga gapu ta naiserran ti highway 130 kalpasan a nagbirri ti paset na ken naideklara a danger zone daytoy.
Nupay kasta, adayu manipud ti maysa kadagiti pagpuspuswakan ti lava iti Papaya Farm dagfiti Ilokano.
Posible nga agbettak ti maysa pay kadagiti bulkan idiay Big Island, Hawaii.
Segun kenni International Bombo Correspondent Manny Pascua manipud idiay Hilo Hawaii, ti nasao a bulkan ket managan ti Mauna Loa volcano.
Kuna na nga adda ti prediksyon a bumtak manen ti Mauna Loa volcano kalpasan ti panagbettak na idi tawen 1984.
Inbatac ni Pascua a ti Kilauea volcano nga agdama nga agal-aburuto ket maibilang a kaaktibuan a bulkan iti intero a lubong.
Innayon na nga addaan ti uppat a bulkan iti Big Island Hawaii.
