LAOAG CITY – Inpakaamo ni Engr. John C. Yamson, Chief, Mine Safety Environment and Social Development Division ti Department of Environment and Natural Resources a rumbeng nga adda dagiti maikabil a warning signs kadagiti lugar a pakaiwayatan ti quarrying activity tapno maliklikan ti pannakalmes dagiti indibidual.
Daytoy ti inrakurakna kalpasan nga adda dagiti nalmes ditoy probinsia gapu ta saanda namnamaen nga adalem ti paset ti karayan a kalpasan a nakutkuton babaen iti naisayangkat a quarry operation.
Segun kenkuana, datoy ti maysa kadagiti rason a mapaspasamak nga aksidente kadagti quarrying sites no sadinno kangrunaan kadagiti malmalmes ket dagiti indibidual nga adda ti impluensiya ti nasanger ken dagiti ubbing.
Mainaig iti daytoy, inpettengna a kasapulan a mangisubmitir ti annual safety program dagiti quarrying companies pakairaman dagiti lokal a gobierno.
Inrakurakna a maysa kadagiti rumbeng a nakaipalaon ket ti pannakaikabil ti senyales tapno mapakaamuan dagiti residente ken mailiklikanda ti mabalin a mapasamak.
Kabayatanna, kunana tapno maipasigurado a masurot dagitoy a banag ket mangiwaywayatda ti inspection ken makikoordinarda kadagiti lokal a gobierno para iti monitoring.
