LAOAG CITY – Inpakaammo ni Mrs. Lizette Atuan, mangidadaulo ti Public Employment Service Office nga awanen ti Sagip Nurse program ditoy probinsia.
Segun kenkuana, napanunutan ti Gobernador a pagbalinen dagitoy a job order kadagiti agdama a pagpapaayanda nga ospital kangrunaanna iti Gov. Roque Ablan Sr. Memorial Hospital ken kadagiti district hospital.
Inbatadna a dakkel a tulong kadakuada ti pananggundaway ti Sagip Nurse program ti probinsia gapu ta daytoy ti nakaalaanda ti ad-adu pay a kapadasanda.
Inlawlawagna nga adda ti posibilidad a dagitoy ket agbalin a permanente no makita ti napintas a performance-da ngem masapolda laeng ti aguray.
Naammoan nga adda ti sumurok 100 a nurse dagiti nabenepisiaran iti daytoy nga addang ti gobierno probinsial.
Kabayatanna, gapu ta awanen daytoy a programa ket manarimaan ti panangplanoda a mangorganisar ti sabali manen nga employment program a saan laeng a para kadagiti adda iti medical field.
