LAOAG CITY – Inbatad ni Doctor Alan Taylan a ti chickenpox wenno tuko ket maysa a klase ti virus a kaadoan a maap-apektaran ket dagiti ubbing.
Segun ken ni Doctor Taylan, dagiti agpasar ti sakit a tuko ket mabalin nga agtrangkaso iti sumagmamano nga aldaw.
Kuna na a no napigsa ti resistensya ti maysa a tao ket awan unay komplikasyon kenkuana ti nasao a sakit.
Innayon na a masapol nga agpabakuna kontra iti sakit a tuko gapu ta dakkel ti maitulong na daytoy iti salun-at ti maysa a tao.
Mainaig iti daytoy, inpalgak ni Doctor Taylan nga awan dagiti maipawil a kanen ti addaan ti sakit a tuko ngem kasapulan a ti kangrunaan nga ipauneg ket dagiti nasustansya a makan.
Kuna na pay a saan a maipawil ti agdigus ngem ketdi uray mamin-ado a daras nga aramiden daytoy laketdi mayat ti rikna ti bagi.
Inpakaammo pay ti doctor a maminsan laeng nga agtuko ti maysa a tao.
