LAOAG CITY – Pinalagipan ti Philippine Statistics Authority (PSA) dagiti Pilipino a sakit iti puso latta ti kangrunaan a rason ti pannakatay dagiti Pilipino.
Iti rekord ti Philippine Statistics Authority, idi 2024, ti sakit iti puso wenno ischemic heart disease ti maysa kadagiti kangrunaan a pakatkatayan dagiti Pilipino.
Basar iti Philippine Statistics Authority, dumanon iti 60,253 kadagiti Pilipino ti makapaspasar ti ischemic heart disease manipud idi Enero agingga idi Agosto 2024.
Sinaruno daytoy ti neoplasms wenno tumor nga agtennag iti cancer.
Iti bilang, dumanon iti 33,910 a Pilipino ti natay manipud iti sakit a neoplasms iti napalabas a tawen.
Maikatlo met ti sakit a mangitunda ti pannakatay dagiti Pilipino ket ti cerebrovascular diseases kas ti stroke wenno brain attack.
Maibasar iti datos ti Philippine Statistics Authority, dumanon iti 30,552 ti nairekord a pimmusay iti napalabas a tawen gapu iti daytoy a sakit.
Kabayatanna, ti maikapat ket ti pnuemonia idinto ti maikalima kadagiti sakit a pakatayan dagiti Pinoy ket ti diabetes.
