LAOAG CITY – Inpakaammo ni Bombo International News Correspondent Devota Sanculi Raymond manipod idiay Geneva, Switzerland a sakripisio ti tulbek iti panagnam-ay iti panagbiag ken kasapulan ti natibker a pakinakem kabayatan ti kaaddana iti ballasiw-taaw.
Segun kenkuana, narigat no awan ti kapamilia iti denna nangruna no addaka iti sabali a pagilian isu a masapol ti doble a panagan-annad gapu ta awan ti pagkamangan a sabali a tao no di ket iti bukud a bagi.
Inbatadna iti naunday a panawen a nagserbi daytoy kas Overseas Filipino Worker ket naladaw a nagasawa gapu iti kalikagumna a matulungan ti pamiliana nga adda ditoy Pilipinas.
Kunana nga idi sumaysayaat ti situasionna idiay Switzerland ket inayabanna ti kabsatna tapno ad-aduda nga agkakabsat a makatulong ken makaurnong para iti pamiliada.
Inlawlawagna a kayatna a maisuro iti kakaisuna nga anak ti panangipateg ti panangistimar ti ina iti anakna maipod iti nasursurona iti inana.
Innayonna nga aniaman a situasion ti sumangbay iti biag ket masapol nga agbalin latta a natibker ti maysa nga ina para kadagiti annakna tapno dagitoyto ti maimula iti panunot ti anak bayat a dumakdakkel dagitoy.
Kabayatanna, naisem nga inburay ni Mrs. Raymond dagiti sakripisio a kapadasanna kas maysa nga ina kagiddan ti pannakarambak ti Mother’s Day ita nga aldaw.
