LAOAG CITY – Balligi a nasaed ti Technical sales representative ti Northern Prime Trading Corp a ni Vilbert Asuncion, agtawen ti 31, ken residente iti Brgy. Sta. Cruz iti ili ti Badoc ken ni Rheygie D.Colobong, agtawen ti 25, residente iti Pacifico iti ili ti Marcos nga aglaklako ti peke a ganagan iti paset ti Brgy. Buyon iti Bacarra kangrunaan iti asideg ti Bislak River ditoy probinsia.
Segun kenkuana, trabahdorna laeng iti Northern Prime Trading Corporation iti paset ti Nueva Ecija no sadinno nga aminado a na-revoke ti lisensia ti nasao nga kompanya gapu ta naduktalan daytoy nga aglaklako ti peke nga abono.
Naammoan nga agbalor iti P40,000 dagiti nakumpiskar nga abono, liquid fertilizer ken dadduma pay a mausar iti panagtalon.
Kinunana a mapanda nga agdeliver iti ili ti Sarrat, Marcos, Dingras ken dadduma pay nga ili kangrunaanna iti ili ti Bacarra ken Badoc.
Nupay kasta, inkari ni Asuncion a saanen daytoy nga aglako gapu ta ammoda a maikanniwas daytoy iti paglintegan ti gobierno nangruna iti biang agrikultura .
Mainaig iti daytoy, inbatad ni Fertilizer and Pesticide Authority Provincial Supervisor Noel Tablada a naiget iti pannakamonitorda iti nadakamat a kompanya .
Kinunana a sipud pay idi bulan ti Marso, ket adda ti mandar ti Department of Agriculture nangruna iti biang ti Fertilizer and Pesticide Authority a dagiti ilaklako ti Northern Prime Trading Corporation ket illegal.
Innayonna nga adda dagiti immunan nakumpiskarda a nagduduma a brand ti ganagan ditoy probinsia nga inlako ken inawaras ti nadakamat a kompanaya.
Gapu iti daytoy, mangipilada ti reklamo kontra iti nasao a kompanya indinto a makumpiskar dagiti mailaklako a peke a ganagan kadgiti mannalon ditoy probinsia.
Kabayatanna, adda iti kustodiar ti Philippine National Police Bacarra ti salesman tapnu maproseso dagiti maipila a kaso kontra kenkuana
