LAOAG CITY – Kiniddaw ti Samahang Para sa Reporma ng Kooperatiba (SPARK) iti Ilocos Norte Electric Cooperative (INEC) a maipababa ti singir ti kuryente ditoy probinsya.
Napasamak daytoy kabayatan ti naiyuswat a taripnong ti dua a kooperatiba.
Inlawlawag ni Mr. Noel Andres, ti pannakangiwat iti Ilocos Norte Electric Cooperative a kayat da a maipababa ti singir ti kuryente ditoy probinsya.
Nupay kasta, inpetteng na a saan da a maipatungpal daytoy agingga a saan a maamendaran wenno mapukaw ti EPIRA Law.
Gapu iti daytoy, napagnunumoan ti dua a kooperatiba nga agsurat da kadagiti miembro ti Ilocos Norte Electric Cooperative tapno dagiti maseknan iti arungaing da ken ni Ilocos Norte 1st District Rep. Sandro Marcos.
Mangnamnama ti dua a kooperatiba a masolusyunan daytoy a banag iti kabiitan a panawen.
Mainaig iti daytoy, ibilang ni Father Arvin Mangrubang, opisyal iti Samahang Para sa Reporma ng Kooperatiba (SPARK) a nabunga ti pannakitaripnong da ken ni Mr. Noel Andres, ti pannakangiwat iti Ilocos Norte Electric Cooperative (INEC).
Inbatad na a malaksid iti kalikagom da a pannakaipababa ti singir ti kuryente ditoy probinsya ket adda pay dagiti dadduma nga isyu a napagsasaritaan ti dua a kooperatiba.
Inpakaammo ni Mangrubang a karaman a nadakamat kadakuada ni Andres ket ti pannakaipaay ti diskwento dagiti senior citizens a miembro ti Ilocos Norte Electric Cooperative.
Segun ken ni Mangrubang, rinugyanen ti Ilocos Norte Electric Cooperative ti agsursur kadagiti nagduduma a barangay tapno ilawlawag da dagiti rason no apay nga adda ti panagngato ti singir ti kuryente, kagiddan ti panagparehistro da kadagiti senior citizens tapno maipaayan da ti diskwento.
Kabayatanna, inpalgak ni Mangrubang a basar iti palawag kadakuada ni Andres ket dagiti charges manipod iti lokal a gobierno kas ti franchise tax, residential tax, real property tax ken dadduma pay.
