LAOAG CITY – Kalikagum ni Mr. Tony Mahor, Presidente ti San Nicolas Damilian Association Inc. a maipangato ti presio ti irik dagiti mannalon.
Segun kenkuana, masapul a mapatgan daytoy nga arungaingda nangruna ita ket saan a nagtubo dagiti inpaay ti Department of Agriculture a bukbukel nga isu koma ti imulada ita a cropping season.
Inbatadna nga uray nangina ti paggatang ti National Food Authority ita ket saanda a kabaelan amin rason nga aglakoda latta iti ruar iti nalaklaka a gatad.
Inlawlawagna nga adda pay gundaway a saandan a nailako ti irik ti National Food Authority gapu ta nabayag unay nga inurayda.
Kunana a dagitoy ti rason no apay a kaykayatda a saanen nga ag-import ti pagilian ti bagas iti sabali a pagilian tapno dagiti produktoda a mannalon ti malakoda.
Inpettengna nga adu dagiti agtaltalon ken agmulmula ti pagay ditoy pagilian a makaumanay a mangsupusop ti kasapulan ti tunggal Pilipino nangruna no husto iti panangsuporta ti gobierno kadakuada ngem gapu iti nababa a presio ti irik ket kaykayat dagiti dadduma nga agmula ti sabali.
Innayonna nga adda dagiti traders nga isuda ti aggatang ti nalaklaka a presio kadagiti mannalon ken mapan ilako iti National Food Authority ti nanginngina a gatad nga isu ti kalikagumda a masolbar.
