LAOAG CITY – Nakikoordinar ni P/Capt. Randy Damo, Hepe ti San Nicolas Municipal Police Station kadagiti agtagikua kadagiti pasdek negosio nga adda iti national highway a saanda nga aramiden a parking area ti sangoananda.
Segun kenkuana, daytoy ket kalpasan a naobserbaranda a daytoy ti maysa kadagiti kangrunaan a rason ti panagirot ti taray ti trapiko nangruna no rush hours.
Inbatadna nga insigida met a nagtungpal dagiti maseknan a business establishment owners maipanggep iti daytoy a banag.
Mainaig iti daytoy, inpakaammo ni P/Capt. Damo a naiget pay ti panagmonitorda iti Manila North Road ken dagiti agturong iti baro a dakkel a mall ditoy siudad ti Laoag tapno maliklikan ti nairot a trapiko.
Innayonna nga agtultuloy nga ipatpatungpalda ti panangikabil kadagiti barikada iti kalsada a mangipasimudaag ti naiget a panangipatungpal kadagiti linteg trapiko.
