LAOAG CITY – Maladingitan ni Mr. Florante Riego, Principal iti San Nicolas National High School gapo ta rumrumwar a ti imatunan na a pagadalan ti mapabpabasol iti pannakatay ti maysa nga estudyante da kalpasan a nagbekkel.
Daytoy ti nagbalin a reaksiyon ni Riego kalpasan nga inpetteng ti ina ti biktima a taga Brgy. 6 iti ili ti San Nicolas a nalapdan kuma ti inaramid ti anak na no napatgan a dagus ti kiddaw da a maiyakar ti section gapu ta maipagarop a mabul-bully iti ayanna a section.
Inlawlawag ni Riego nga inaramid da amin a kabaelan da ken patien na nga awan iti nagkurangan ti nadakamat a pagadalan.
Inpakaammo na a basar iti imbestigasyon da, iti maikadwa nga aldaw ti School Year 2024-2025 ket nagpakada ti biktima iti maestra na a mapan iti Comfort Room gapo ta nasakit ti buksit na, ngem kalpasan ti sumagmamano nga oras ket saan metlaeng a rumuar ti nasao nga estudyante.
Kuna ni Riego nga idi simrek ti sumaruno a mangisuro iti classroom da ket nagcheck iti attendance, ngem gapu ta saan na a makita ti nasao nga estudyante ket sinarak na daytoy ket inbaga dagiti kaadalan na nga adda paylaeng iti uneg ti Comfort Room.
Gapo iti daytoy, nagdanag ti subject teacher da isut gapuna nga inayaban da ti adviser na tapno parwaren da ti estudyante.
Innayon ni Riego a gapu ta saanda a malukatan ti ridaw ket tinuktuktuk da ngem awan pulos ti sungbat ti nasao nga estudyante.
Naamoan a rimuar laeng ti estudyante idi napan ti ina kalpasan a tineksan na daytoy a mapan na sukunen iti pagadalan.
Inpalgak ni Riego a sakbay a nagawid dagiti agina ket nagsasarita da iti opisina na ken ditoy nga inpetteng ti estudyante a mabulbully ken kalikagum na a maiyakar iti section, ngem saan da nga immanugot gapu ta napagtulagan da nga imbestigaren da nga umuna ti napasamak.
Inrakurak ni Riego nga inlawlawag da a no malpas ti panagimbestigar da ket makita da a ti kapintasan a solusyon ket ti pannakaiyakar na ti section ket isu ti aramiden da, ngem saan metten a nauray ti estudyante gapu ta kinettel nan ti bukod na a biag.
Kabayatanna, kinumpirmaran ni Riego nga adda dagiti kaso ti bullying iti nasao a pagadalan iti kallabes ngem insigida da a tinaming dagitoy tapno saanen a kumaro gapo ta naiget ti panangsurot da ti child protection policy ti Department of Education.
