LAOAG CITY – Nakaaramid ti pakasaritaan ni Sanae Takaichi kas kaunaan a babai a Prime Minister idiay Japan.
Nangabak ti agtawen ti 64 iti clear majority nga addaan ti butos a 237 iti Lower House ken sabali pay a 125 iti Upper House kas lider ti ruling Liberal Democratic Party (LDP).
Kitaen ni Takaichi iti agdama a sangsangoen a pannubok ti ekonomia ti Japan ken ti ngumatngato a presio dagiti magatgatang a produkto.
Inabakna ti uppat a lallaki iti Liberal Democratic Party iti nasapa a paset ti Oktubre ken isuna ti maibilang a maikapat a Prime Minister iti uneg laeng ti lima a tawen.
Makitaripnong ni Takaichi ken ni United States President Donald Trump inton sumaruno a lawas para iti ad-adda pay a panangpatibker iti relasionda ti Estados Unidos.
Mainaig iti daytoy, iti tawen nga 64, saanen a damo ken ni Takaichi iti lubong ti pulitika idiay Japan no sadinno nga am-ammo isuna a kaduana ni dati a Prime Minister Shinzo Abe, nagiggem kadagiti sumagmamano a ministerial roles ken datin a nagpaidasig para iti posision ti Prime Minister.
Naelektaran isuna kas Liberal Democratic Party leader kalpasan a nag-resign ni dati a Prime Minister ken Liberal Democratic Party leader Shigeru Ishiba gapu iti dakkel nga epekto ti midterm elections.
Naammoan a nabirngasan ni Takaichi kas “Iron Lady” gapu iti panangidolona ken ni dati a British Prime Minister Margaret Thatcher.
Kabayatanna, am-ammo pay ni Takaichi kas addaan ti konserbatibo a takder pakairamanan ti same-sex marriage ken pannakaipalubos iti panangpatalinaed dagiti naasawaan a babbai ti apelyidoda idi balasang dagitoy.
