LAOAG CITY – Nagkedkedan ti Sandiganbayan Fifth Division ti kiddaw ti pito nga opisial ti Department of Public Works and Highways (DPWH) nga isuspenso wenno ibasura dagiti arrest warrants-da mainaig iti maipagarup a flood control scam idiay Oriental Mindoro.
Segun iti petision ti Lim & Yutatco-Sze, ibagbagianna dagiti opisial nga isuda Gene Ryan Altea, Ruben Santos Jr., Dominic Serrano, Montrexis Tamayo, Juliet Calvo, Dennis Abagon ken Lerma Cayco a “blatant violation” iti due process ti pannakaipila ti kaso ti Office of the Ombudsman.
Karaman iti umuna a bansada dagiti kaso ti dati nga Ako Bicol Rep. Elizaldy ”Zaldy” Co ken ti board of directors ti Sunwest Inc., a maipagarup a kukua ni Co nga adda ti pakainaganna iti proyekto ti Mag-asawang Tubig River Flood Control Project nga agbalor ti P289.5 million.
Ti kaso ket adda ti pakainaiganna iti Anti-Graft and Corrupt Practices Act (RA 3019) ken malversation of public funds through falsification of public documents, basar iti findings ti Independent Commission for Infrastructure (ICI) a maibagbaga a substandard ti inusar a materyales kas ti steel sheet piles.
Inpetteng dagiti Department of Public Works and Highways officials a manarimaan pay laeng ti proyekto ken saan pay a nasken a palpasen ti konklusion ti pannakadadael iti gobierno.
Nupay kasta, kuna ti Ombudsman a substandard ken saan a kumpleto ti proyekto ken kimmanunong iti daytoy ti Sandiganbayan nga awan ti legal merit ti petision ti pito a Department of Public Works and Highways officials.
Gapu iti daytoy, maipatungpal ti arrest warrants kontra kadagiti pito a Department of Public Works and Highways officials, basar ken ni Ombudsman Jesus Crispin “Boying” Remulla nga inbilinna kadagiti otoridad nga ipatungpal nga insigida daytoy.
Basar iti datos ti “Sumbong sa Pangulo,” karaman ti Sunwest kadagiti top 15 contractors a nakaala ti agarup P10 billion manipud idi Hulio 7, 2022 agingga iti Mayo 2025 para iti flood control projects iti babaen ti administrasion Marcos.
