LAOAG CITY – Nangiparuk-at ti maysa a precautionary hold departure order (PHDO) ti Sixth Division ti Sandiganbayan kontra ken ni Senador Francis Joseph Chiz Escudero ken ti maysa a pribado nga indibidwal.
Basar iti dokumento nga inparuk-at ti anti-graft court, binilin ti anti-graft court ti Commissioner ti Bureau of Immigration a lapdan a makaruwar iti Pilipinas dagiti nasao a respondents.
Malaksid iti senador, karaman pay a naikabil iti Hold Departure List ti maysa nga indibidwal a nabigbig a ni Maynard Siy Ngu.
Nailanad iti aplikasyon ni Escudero kas maysa a Senador ken ni Ngu kas maysa a Private Citizen.
Ti nasao a direktiba ket namonganay manipod iti maysa a Verified Ex Parte Application for the Issuance of a Precautionary Hold Departure Order a naipila iti Sixth Division ti korte.
Naipagagangay nga iparparuk-at ti Sandiganbayan ti nasao nga addang kas panagan-annad tapno masigurado nga agtalinaed iti uneg ti hurisdiksyon ti pagilian dagiti indibidwal a possible a sumangsango kadagiti preliminary investigation wenno reklamo.
Iti agdama, maiyur-uray paylaeng ti opisyal a rakurak manipod iti kampo ni Senador Escudero ken ni Ngu mainaig iti naiparuk-at a pammilin, kasta met ti kumpirmasyon manipod iti Bureau of Immigration seknan iti pannakaipatungpal a dagus ti precautionary hold departure order.
