LAOAG CITY – Dimmanonen iti Sang. Bayan iti ili ti Dingras ti maipagarop a pannaka-issue ti Barangay Certificate kadagiti uppat a locally stranded individual a rumrumwar a saan a residente iti Barangay Francisco nga idadauwal ni Brgy. Chairman Narciso Oriente.
Daytoy ti kinumpirmaran ni Vice Mayor Erdio Valenzuela ken SBM Joey Apostol, ti chairman ti Committee on Laws.
Segun kada Valenzuela ken Apostol, ti ina ken ama ket pudno a residente iti ili ti Dingras ngem dagiti kakadwa da nga uppat ket rumrumwar a taga Pampanga.
Ti makweskwestyunaran iti daytoy ket no apay a sinertipikaran ti kapitan a residente iti Barangay Francisco dagiti uppat nga LSI.
Gapo iti daytoy, agimbestigar ti Sang. Bayan in aid of legislation.
Maipalagip a dagiti nadakamat nga LSI ket positibo iti covid-19 ken idi agdama ket naka-isolate dagitoy.
Inbatad ni Valenzuela a daytoy ti rason no apay a naannad da iti panagakseptar kadagiti LSI.
Kabayatanna, ikarkarigatan met ti Bombo Radyo a maalaan ti reaksyon ti kapitan mainaig iti daytoy.
