LAOAG CITY – Natay ti maysa a miembro ti Sangguniang Bayan iti ili ti Solsona kalpasan a naidungpar ti nagluganan na a motorsiklo iti likod ti maysa a kotse.
Napasamak ti desgrasya iti Sitio Cabuloan, Brgy. 21 San Marcos iti ili ti Sarrat.
Nabigbig ti biktima a konsehal nga agtawen ti 53, ken residente iti Brgy. Laureta iti ili ti Solsona.
Segun kenni Police Major Carlo Abing, hepe ti PNP Sarrat, nakalugan ti biktima iti mio a motorsiklo ken agpadpadaya a direksiyon iti Sitio Cabuloan kasta met ti kotse.
Nupay kasta, iti panagpakannigid ti kotse a sumrek iti barangay road kalpasan a pinalabas na ti maysa a tricycle ket kelaat a naidungpar ti motosriklo iti likod ti kotse.
Dagus met a naitaray ti konsehal iti ospital ngem bayat a maag-agasan daytoy ket pimmusay
Agtultuloy pay laeng ti imbestigasyon dagiti otoridad kalpasan ti desgrasya.
