LAOAG CITY – Agtultuloy ti search and rescue operation dagiti otoridad ken ni Dumalneg Municipal Councilor Pedro Cascayan kalpasan a naireport a mapukpukaw manipud idi Sabado, Setiembre 21, 2024.
Segun ken ni P/Capt. Junjun Medina, chief of police ti PNP Dumalneg, nagturong iti kabambantayan a paset ti Brgy. Quibel ni Konsehal Cascayan tapno agala iti rattan ngem nayaw-awan daytoy iti dalan bayat ti panagsublina isu a nagkiddaw daytoy iti tulong.
Dagus a nangbukel dagiti otoridad iti dua a grupo babaen ti tulong ti Regional ken Provincial Mobile Force Company ken Phil. Marines para iti panagsapol ti nadakamat a konsehal iti nasao a lugar a naudi nga inted na a impormasyon mainaig ti lokasyon na ket iti Brgy Isic-Isic iti ili ti Vintar.
Segun ken PCapt. Medina, saanen a nakapagkontak ti konsehal manipud idi kalman ti bigat na gapu ta mabalin a na-lowbat ti selponna.
Iti agdama, agtultuloy a makikoordinar dagiti polis kadagiti otoridad nangruna kadagiti Local Disaster Risk Reduction Management Office wenno LDRRMOs tapno matunton ti ayan ti nadakamat a konsehal.
