LAOAG CITY – Indeklarar ti Sang Panlalawigan nga ‘invalid-in-part’ ti ordinansa nga inpasa ti Sang Panlungsod ditoy ciudad ti Laoag mainaig iti pannakaipawil ti panagparti kadagiti dingwen iti arubayan.
Inlawlawag ni Bokal Hanson Chua a saanna a kayat a sawen daytoy nga inbasura da ti ordinansa no di ket mabalin da a balbaliwan ti pasetna nga ibilang da nga invalid.
Kuna ni Chua a general unay ti nasao a paset ti ordinansa gapu ta maibilang a total prohibition daytoy, no sadinno a maibasar iti linteg nga inpakita ti legal Officer ket nalabes unay.
Innayon na nga imbes a prohibitive ket agbalin daytoy a regulative ta no kitaen ti linteg ken ti pannakaaramid ti National Meat Inspection Service, ti pannaka-regulate ti panagparti ti dingwen iti arubayan ket dagiti mailako a daytoy nga ordinansa ti ad-adda pay a mangpatibker ti implementasyon ti datin a linteg.
Maipalagip nga immunan nga inpasa ti Sang Panlungsod ditoy ciudad ti ordinansa a mangipawil ti panagparti ti dingwen dagiti pagtaengan wenno iti arubayan a kwinestyunaran met ni Konsehal Jason Perera.
