LAOAG CITY – Kweskwestyunaran ti Sang. Panlalawigan ti proseso ti panaggatang ti bakuna kontra covid-19.
Daytoy ti naiget nga ad-adalen dagiti kameng ti Sang. Panlalawigan bayat ti pannakatratar ti gakat a pannakareprograma ti 20% development fund nga agdagop ti 12 a milyon a pisos manipud iti unexpended balance iti calendar year 2017-2020.
Naamoan a daytoy ket kalpasan nga ado dagiti saludsod a saan a masungbatan mainaig iti panaggatang ti probinsya ti bakuna.
Kalikagom ni Bise Gobernador Cecilia Araneta Marcos a maarisit ken maadal a naimbag tapno maamoan no kaano a gumatang ti probinsya ti bakuna ken no kasano ti proseso ti panaggatang ti bakuna.
Kinanunungan met daytoy ni Sang. Panlalawigan Member Domingo Ambrocio a nupay kanayon nga agap-appropriate ti SP ti pondo a paggatang ti bakuna, no awanen ti magatang pay ket sayang met laeng ti mailatlatang a pondo.
Inpakammo met ni Dr. Medeldorf Gaoat nga awan pay ti desisyon no anya a klase ti bakuna ti gatangen ti probinsya ngem addan ti dua a kompanya ti nangipakita ti intensyon na a mangilungalong ti bakuna da ditoy probinsya kas iti Novavax ken Sputnik V.
Inkalintegan met ni Atty. Donald Nicola, chairman ti Committee on Appropriation a kasapulan nga adda ti nakasagana a pondo a paggatang ti bakuna gapo ta kadagitoy a gundaway ket narigaten ti makapag-order ti bakuna manipud iti nagduduma a parmaceutical company gapo iti global demand.
Kunana a no ar-arigen ket bassit pay laengti nailatang a pondo para kadagiti 480,000 a residente ditoy Ilocos Norte rason a kasapulan ti ad-ado pay a pondo.
Nupay kasta, inbatad na a ti 12 milyon a pisos ket isu pay laeng ti available fund a sinertipikaran ti Local Finance Committee a matratar malaksid ti ummunan a naaprubaran a 12 milyon a pisos.
Gapo iti daytoy, kalikagom da a mangayab ti kameng ti Task Force Salun-at a mangsubat iti daytoy a saludsod.
