LAOAG CITY – Kinumpirmaran ni Sang. Panlalawigan Member Jonathan Toralba, ti Chairman ti Committee on Agriculture a mangputar da ti ordinansa seknan iti pannakalimitar ti sumrek a frozen meat ditoy probinsya.
Segun kenni Toralba, dagiti laeng accredited ti rumbeng a paggapoan dagiti frozen meat ken dagiti laeng masuplayan ket dagiti agar-aramid ti longganisa ken bagnet ditoy Ilocos Norte.
Inlawlawag na nga ibaga da iti Provincial Veterinarian a kuntaren da no mano ti masapol dagiti agar-aramid ti longganisa ken bagnet tapno isu laeng ti mapalubusan a maiserrek.
Daytoy ket gapo rumrumuar nga adda pay dagiti agsupsuplay ti frozen meat kadagiti aglaklako ti karne kadagiti merkado publiko ditoy probinsya malaksid pay nga isu ti maiapagarop nga us-usaren dagiti caterers gapo ta nalaklaka ti presyo na.
Ti nasao nga isyu ket rimuar kabayatan ti naiyuswat a committee hearing nga inatendaran dagiti hog raiser, hog dealers ken dadduma pay a maseknan.
Kunana a gapo iti maipagarop a pannakasuplay dagiti eat vendors kadagiti frozen meat ket sigurado a malalaukan met dagiti gatgatangen ti publiko a ti ammo da ket fresh meat amin dagitoy.
Mainaig iti daytoy, inbatad na a dagiti aglabsing iti daytoy ket mapatawan ti multa.
Kabayatanna, kuna ni Toralba a karaman pay iti putaren da nga ordinansa ket ti pannakaikeddeng ti presyo ti karne.
Inpalgak na a kalikagom da a sangsangkamaysa ti presyo iti Ilocos Norte kas iti 180 pesos iti kada kilo ti live weight ken 280 a pisos ti panaguraga a tapno awan ti tumaod a reklamo.
Innayon na trataren dan to pay daytoy iti sumarsaruno nga aldaw ken a posible a maipatungpal kalpasan ti All Souls Day.
Iti sabali a bangir, inbatad ni Toralba a no adda ti ordinansa ti maysa nga ili a maiparit ti panagiserrek ti baboy manipud iti sabali a lugar ditoy Ilocos Norte ket awan ti problema ken rumbeng nga isu ti masurot.
