LAOAG CITY – Kalikagom ni Sang Panlalawigan Member-elect RJ Fariñas ti mangipasa iti ordinansa para iti pannakaiyalokar ti pondo kadagiti amin a barangay ditoy probinsya tapno adda ti maigatang iti agas a maibunong a libre kadagiti umili.
Inlawlawag na nga iti panagsursurna kangrunaan na kadagiti adayo a barangay ditoy probinsya ket nakita na a ti agas ti maysa kadagiti kangrunaan a kasapulan dagiti residente.
Kuna na nga adda man ti Philhealth Consulta ngem ti problema ket saan met a maikkan amin dagiti umili.
Innayon na nga adda paylaeng dagiti munisipyo nga awan ti Philhealth Consulta na.
Mainaig iti daytoy, inrakurak pay ni Fariñas a kalikagom na a maipaayan ti tinawen a benepisyo dagiti senior citizens isut gapuna a plano na ti bumisita kadagiti nagduduma a munisipyo tapno kiddawen ti panangipasa da ti ordinansa para iti daytoy nga addang.
Inpalgak ni Fariñas nga adda dagiti nakasarsarita na a senior citizens a saan a makaaw-awat ti social pension na manipod iti Department of Social Welfare and Development.
Kabayatanna, kuna ni Fariñas a no maikkan ti gundaway ket kalikagom na nga idaulwan ti Committee on Agriculture tapno maitultuloy na ti narugyan na iti Sang Panlungsod a panangipaay ti tulong kadagiti mannalon ken mangngalap.
Inpanakkel na nga iti kaadda na iti Sang panlungsod ket naipayalokaran na ti nasurok a 3-milyon a pisos para kadagiti mannalon ken mangalap ditoy ciudad ti Laoag.
