LAOAG CITY – Nangiparuk-at ti Sangguniang Panlalawigan ti Cease and Desist Order iti Converge Internet Company ditoy Ilocos Norte.
Daytoy ket kalpasan a kiniddaw ti hunta probinsial a temporario a maipasardeng ti nasao a kompania gapu iti kinaawan pay ti napanday a resolusion.
Segun ken ni Bokal Atty. Da Vinci Crisostomo, ti Chairman ti Committee on Laws, Rules, Ethics and Privileges, daytoy ket tapno pangur-urayan ti resolusion a maipasa pakaseknan iti panangendorsar tapno masurot met laeng ti masnop a proseso.
Inbatadna a gapu ta saan a mapnek dagiti agpanpanday linteg ti sungbat ni Mr. Edwin Mabitazon, ti pannakabagi ti nasao a kompania nangruna ket kurang dagiti maipaayda nga impormasion mainaig iti kalikagumda a maipasdek a proyekto.
Inlawlawagna a nasken a makumpleto nga umuna ti kompania ti panangipaay ti company profile ken certificate of corporation tapno ad-adda a maam-ammo ti probinsia ti maseknan a kompania.
Kuna ni Mr. Mabitazon a ti kompaniada ket mangidiaydiaya ti serbisio ti internet manipod iti submarine cable network idiay Estados Unidos ken adda dagiti naiyestablisar a Central Office ken backbone-da para iti pannakaibunong dagitoy nga internet service kadagiti pagtaengan ditoy probinsia.
Nupay kasta, inadmitirna a marigatanda a mangikonektar iti serbisio ti internet para kadagiti adayo ken nasusulinek a lugar gapu iti nakapsot a signal wenno kinaawan ti panag-access iti internet.
Innayonna a nangrugi ti operasion ti kompaniada idi pay laeng tawen 2004 ken addan dagiti sumagmamano a klienteda kadagiti sumagmamano nga ili ditoy probinsia kagiddan ti panangidasarda iti target plan a gagemda a maipatungpal.
Mainaig iti daytoy, kuna ni Bokal Domingo Ambrocio Jr. a kalikagum ti hunta probinsial a mapagsungbat ti nasao a kompania no apay nangrugin ti operasionda iti laksid nga awan pay ti panangiyendorsar ti Provincial Government of Ilocos Norte pakairamanan ti posible nga epekto ti submarine kadagiti Marine Protected Areas ditoy probinsia.
Naammoan a ti Converge Internet Company ket nangirubuat ti 37,136 ports iti intero a probinsia manipod iti orihinal a target a 70,000 ports wenno 53.01 percent sakbay a maileppas.
Kabayatanna, addan ti 13 a lugar ditoy probinsia ti nakaikonektaranen ti koneksion ti internet access connection pakairamanan iti ili ti Currimao, Bacarra, Pasuquin, Badoc, Burgos, Bangui, Marcos, Paoay, Dingras, San Nicolas, Pinili, Pagudpud ken ditoy siudad ti Laoag.
