LAOAG CITY – Nangipasa ti Sangguniang Panlalawigan ti resolusyon para iti panangkiddaw da ken ni Presidente Rodrigo Roa Duterte a maideklara kas Special Non-Working Holiday intono September 11, 2021 kas panangbigbig ken ni dati a Presidente Ferdinand Edralin Marcos.
Ti Septiembre 11 ket isu ti kaaldawan ti panagkasangay ti dati a Presidente ken mailablaban a ti nasao nga aldaw ket maibilang a Marcos Day.
Segun ken ni Sangguniang Panlalawigan Member Atty. Saul Paulo Lazo, ti Chairman ti Committee on Education and Culture, maiyataday laeng a mangipasada ti nadakamat a resolusion gapu kadagiti naruay a kontribusion ni dati a Presidente Marcos nga agpapan kadagitoy a gundaway ket maus-usar ken pagnamnam-ayan ti kaadduan.
Pimmabor amin dagiti Bokal a nagatendar kabayatan iti Regular Session pakairamanan ni Bise Gob. Cecilia Araneta Marcos kas Presiding Officer ti pannakaipasana ti nasao a resolusion.
Kabayatanna, mangnamnama ti junta probinsyal nga aprubaran daytoy ti opisina ni Presidente Duterte.
