LAOAG CITY – Maisayangkat ti deliberasyon ti “2024 proposed budget” ti gobierno probinsial iti Sang. Panlalawigan mangrugi intono bigat, Nobiembre katorse ken agpatingga intono Nobiembre 16.
Mainaig iti daytoy, inpakaammo ni Provincial Budget Officer Mrs. Leah Blas a dagiti pangopisinaan a karaman iti Local Finance Committee wenno LFC a kas iti Provincial Budget Office dagiti umuna a mangipresentar iti budget da para iti sumaruno a tawen.
Imbatadna nga addan ti naawatna a surat manipud iti Sang. Panlalawigan para iti panangipresentarda ti budgetda iti sumaruno a tawen iti nasao a deliberasyon ita nga aldaw.
Inbunannagna a ti mailunglungalong a budget ti opisinada para iti sumaruno a tawen ket siyam a milyon sanga gasut siyam a pulo ket lima ribu lima gasut duapulo ket siyam a pisos ken pitopulo a sentimos (Php 9,195,529.7).
Nupay kasta, inlawlawag ni Blas nga awan ti nailatang a para iti capital outlay ti opisinada iti sumaruno a tawen.
Impalgakna a ti nailatang a budget para iti “personal services” ti opisinada ket walo a milyon dua gasut innem a pulo ket dua ribu siyam a gasut siyam a pulo ket walo a pisos (Php 8,262,998). Innayonna a dakkel ti nailatang a budget agsipud ta daytoy ket para iti sueldo ken bonus ken dagiti empleado ti Provincial Budget ket permanente malaksid laeng ti maysa a casual nupay adda pay ti bakante iti naituding a sangapulo a personnel ti Provincial Budget Office.
