LAOAG CITY – Nagkampeon ti Sang Panlungsod iti ciudad ti Batac babaen ti pannakagun-od na ti iskor a 99.50% para iti 2025 Local Legislative Awards ditoy probinsya.
Naisayangkat ti assessment manipod iti Hunyo 30, 2022 agingga iti Hunyo 30, 2025 no sadinno a kadagita a panawen ket indaulwan paylaeng idi ti bise mayor a ni Atty. Windell D. Chua..
Gapu iti panangabak ti gobierno lokal iti ciudad ti Batac ket daytoy ti provincial nominee para iti Regional Local Legislative Awards.
Ti Local Legislative Awards ket indaulwan ti Department of the Interior and Local Government babaen ti Provincial Awards Committee, kadwa da ti Philippine Councilors League–Ilocos Norte Chapter ken ti Vice Mayors League of the Philippines–Ilocos Norte Chapter.
Mainaig iti daytoy, nagyaman ni Vice Mayor Albert Chua iti panangabak da iti nasao a pammadayaw.
Inlawlawag na a dagiti nagibasaran para iti nasao a pammadayaw ket no kasanu ti pannakataming dagiti maputar nga ordinansa wenno resolusyon nga adda ti pakainaigan dagiti vulnerable sector; dagiti serbisyo ken programa nga ipapaulog ti Department of the Interior and Local Government ken dadduma pay.
